ai ishq ! kahiN ley chal !

by Akhter Shiraani

	

Akhter Shiraani's real name was Muhammad Akhter Khan. He was born on May 4th, 1905 and died in Lahore on September 9th, 1948. His style of writing is very similar to Majaz, talking mostly about love. While Majaz was highly ornamental in his writing, Akhter Shiraani used simple Urdu words; but the effect was not less than any other poet. --- kashif


unn chand sitaaroN key bikhrey huey shahroN meiN
unn noor ki kirnoN ki Thahri hui lahroN meiN
Thahri hui nahroN meiN, soiee hui lahroN meiN

ai kHizr-e-haseeN ley chal! ai ishq kahiN ley chal!

aankhoN meiN samaai hai ik kHwaab-numaa duniya
taaroN ki tarah raushan mahtab numaa duniya
jannat ki tarah rangeeN shadaab numaa duniya

lillah wahiN ley chal! ai ishq kahiN ley chal!

yeH dard bhari duniya basti hai gunaahoN ki
dil chaak ummidoN ki, saffak nigahoN ki
zulmoN ki, jafaaoN ki, aahoN ki, karaahoN ki

haiN gHam sey haziN, ley chal! ai ishq kahiN ley chal!
[ haziN= full of sorrow]

qudrat ho himaayat per, humdard ho qismat bhi
salma bhi ho pahloo meiN, salma ki muhabbat bhi
har shai meiN faragHat ho, aur teri inaayat bhi

ai tifl-e-haseeN ley chal! ai ishq kahiN ley chal!

hum prem pujari haiN, tu prem kanhaiyya hai
hum prem kanhaiyya haiN, yeH prem ki nayyaa hai
yeH prem ki nayya hai, tu iss ka khiwayyaa hai

kuchh fikr nahiN ley chal! ai ishq kahiN ley chal!


anam- pahla  safaH bazm- a forum for contemporary Urdu poetry khazana- a treasure for Urdu lovers write to kashif- the webmaster